ប្រែសម្រួល៖ តារា

ទីក្រុងឡុងដ៍៖ ក្រោយពីមានដំណាក់កាលលេងមិនល្អ ក្លិបអាសេណល កំពុងបង្កើតសន្ទុះថ្មីម្តងទៀត ប៉ុន្តែត្រូវរក្សាទម្រង់លេងដ៏ល្អនេះ នេះបើតាមការលើកឡើងរបស់គ្រូបង្វឹក លោក មីកែល អាតេតា ក្រោយក្រុមរបស់លោកយកឈ្នះក្លិបវេស្ថហេម យូណៃធីត ៥-២ កាលពីថ្ងៃសៅរ៍។

ជ័យជម្នះនេះបានជួយឱ្យអាសេណលឡើងទៅលេខ២ វិញនៅក្នុងក្របខណ្ឌ Premier League និងបញ្ជាក់ថាពួកគេបានត្រឡប់មករកទម្រង់លេងល្អវិញហើយ បន្ទាប់ពីមិនអាចឈ្នះបាន៤ប្រកួតជាប់ៗគ្នាមុនពេលសម្រាកអន្តរជាតិខែនេះ។

កីឡាករ ហ្គាប្រីអែល, លេអាន់ដ្រូ ត្រូសឺត, ប្រធានក្រុម ម៉ាទីន អូដេហ្គាត, ខៃ ហាវឺត និង ប៊ូកាយ៉ូ សាកា បានស៊ុតចូលម្នាក់មួយគ្រាប់ក្នុងតង់ទីមួយដ៏គួរឱ្យរំភើបដែលមានគ្រាប់បាល់រហូតដល់៧គ្រាប់នៅកីឡដ្ឋាន London Stadium។ ជាមួយលទ្ធផលនេះ អាសេណលមាន២៥ពិន្ទុ តាមក្រោយក្លិបលីវើភូល ៦ពិន្ទុ ដែលត្រូវប៉ះជាមួយក្លិបមេនឆេស្ទ័រ ស៊ីធី ម្ចាស់ជើងឯកដែលកំពុងមានបញ្ហានៅកីឡដ្ឋាន Anfield នៅថ្ងៃអាទិត្យ។

លោក អាតេតា ដែលក្រុមរបស់លោកបានយកឈ្នះក្លិបណតធីងហ្វាម ហ្វរេស្ថ ៣-០ កាលពីថ្ងៃសៅរ៍សប្តាហ៍មុន និងបន្ទាប់មកយកឈ្នះក្លិប Sporting ៥-១ នៅក្រៅទឹកដីក្នុងក្របខណ្ឌ Champions League បាននិយាយប្រាប់អ្នកសារព័ត៌មានថា៖ “បាទ យើងមានសន្ទុះល្អ។ ខ្ញុំគិតថាយើងមានលំហូរលេងល្អត្រឡប់មកវិញ ការប្តេជ្ញាចិត្តពិតប្រាកដ ការឈ្នះជាប់ៗគ្នាលើគូប្រកួតបីក្រុមគឺជារឿងអស្ចារ្យ។”

“យើងនឹងរីករាយនឹងប្រកួតយប់នេះ និងមើលការប្រកួតបាល់ទាត់ដ៏ស្អាតមួយនៅថ្ងៃស្អែក។ យើងកំពុងស្ថិតក្នុងពេលវេលាដ៏ល្អឥឡូវនេះ។”

គ្រូបង្វឹកជនជាតិអេស្ប៉ាញរូបនេះដែលក្រុមរបស់លោកត្រូវទទួលក្លិបមេនឆេស្ទ័រ យូណៃធីត នៅក្នុងក្របខណ្ឌ Premier League នៅថ្ងៃពុធ បានបន្ថែមថា៖ “ប៉ុន្តែនៅក្នុងបាល់ទាត់ ត្រូវប្រុងប្រយ័ត្ន និងត្រៀមខ្លួនឱ្យបានល្អបំផុត។”

ការត្រឡប់មកវិញរបស់ប្រធានក្រុម អូដេហ្គាត ក្រោយសម្រាកព្យាបាលរបួសកជើងយូរ គឺជាការលើកទឹកចិត្តដ៏សំខាន់សម្រាប់អាសេណល ខណៈដែល សាកា មើលទៅមានកម្លាំងឡើងវិញក្រោយមិនបានចូលរួមជាមួយក្រុមជម្រើសជាតិអង់គ្លេសលើកចុងក្រោយដោយសាររបួសតិចតួច។

ក្រៅពីការស៊ុតបាល់ប៉េណាល់ទី សាកា បានបន្ថែមការបញ្ជូនបាល់ឱ្យមិត្តរួមក្រុមស៊ុតចូល២ដងទៀតនៅថ្ងៃសៅរ៍ ធ្វើឱ្យរូបគេមានការបញ្ជូនបាល់ឱ្យមិត្តរួមក្រុមស៊ុតចូល១០ដងក្នុង១៣ប្រកួត ច្រើនជាងកីឡាករ មូហាម៉េត សាឡា ដែលមានចំនួនច្រើនជាងគេបន្ទាប់ចំនួន៤ដង។

លោក អាតេតា បាននិយាយអំពី សាកា ថា៖ “អស្ចារ្យណាស់។ ព្រោះវាជារឿងលំបាកបំផុតក្នុងបាល់ទាត់ ដូច្នេះកីឡាករដែលអាចជឿជាក់នៅក្នុងពេលវេលាទាំងនោះ អាចជះឥទ្ធិពលដល់លទ្ធផលតាមរបៀបនោះ អ្នកដឹងទេ តម្លៃនៃរឿងនោះគឺមហិមាណាស់។”

សាកា លេងបានយ៉ាងល្អឥតខ្ចោះនៅតង់ទីមួយ ជាពិសេសនៅពេលដែលអាសេណលកំពុងលេងល្អជាងគូប្រកួតក្នុងទីក្រុងឡុងដ៍របស់ពួកគេ។

រូបគេបាននិយាយថា៖ “ថ្ងៃនេះយើងបង្ហាញទម្រង់លេងល្អបំផុត និងស៊ុតបានគ្រាប់បាល់ជាច្រើន – យើងកំពុងលេងបាល់ទាត់ល្អឥឡូវនេះ ហើយយើងចង់បន្តបែបនេះទៀត។” “យើងត្រឡប់មករកទម្រង់លេងល្អបំផុតរបស់យើងវិញហើយ។ យើងមើលទៅមានលំហូរលេងល្អ និងឆាប់រហ័ស យើងទាំងអស់គ្នាកំពុងរីករាយនឹងវាឥឡូវនេះ។”

“វាជាសប្តាហ៍ដ៏ល្អបំផុតសម្រាប់យើង។ យើងបានបង្កើតសន្ទុះជាច្រើន ហើយយើងចង់បន្តទៅប្រកួតប៉ុន្មានខាងមុខទៀត។”

ប្រភព៖ Reuters